Eibarrek berriro ere Ipurua izango du topaleku. Armaginak hamabost punturekin eta bost garaipen jarraian iritsiko dira gaurko partidara, azken biak etxetik kanpo lortutakoak, Vigoren eta Eldaren aurka. Arratsalde honetan, ordea, beste erronka bat izango dute aurrean: Las Palmas. Partida 18:30ean hasiko da.
Jokin Aranbarri baikor agertu da taldeak azken asteetan egin duen ibilbidearekin, baina argi utzi du oraindik badagoela zer hobetu. «Pozik gaude egiten ari garenarekin, baina hobetzen jarraitu nahi dugu: ekimena izan, aurkariaren bila joan eta nagusi izateko une gehiago izan», azaldu du. Entrenatzailearen ustez, taldeak partida bakoitzean agertzen diren egoera desberdinetara egokitzeko erakutsitako gaitasuna da bere indarguneetako bat, eta bide horretan jarraitzeko beharra azpimarratu du.
Konfiantza eta taldearen konpromisoa
Aranbarrirentzat, ordea, futbolaren alderdi taktikoaz harago, jokalariek egiten dutenarekin sinestea da taldearen bilakaeraren gakoetako bat. «Garrantzitsuena da jokalariak une bakoitzean egiten ari direnarekin konbentzituta egotea, denak norabide berean joatea», adierazi du.
Horren adibide gisa Eldan bizitakoa jarri du. Eibar 0-2 aurretik jarri zen eta, ondoren, atzerago defendatu behar izan zuen. Egoera horietan ere taldeak lasai egon behar duela defendatzen du Aranbarrik, jokalariek zer egin behar duten argi badute. «Rivalak posizionamendua edo ideia alda dezake emaitzaren arabera, eta oso garrantzitsua da zelaian dagoen jokalariak zer egin behar duen sentitzea, konbentzituta egotea eta taldekidearekin harremana izatea», azaldu du.
Las Palmasen aurka, hain zuzen, egoera desberdinak izango dituen partida espero du. Eibarrek baloiaren jabetza izango duen uneak egongo dira, goian presioa egiteko aukerak ere bai, baina baita kanariarrek taldea atzerago sartzera behartuko duten tarteak ere. Horregatik, «ideiak argi izatea eta denok gauza bera sentitzea» ezinbestekotzat jo du.
Las Palmasen aurkako erronka
Aurkariari dagokionez, Aranbarrik Las Palmasen kalitatea eta jokoan sortzen duen eskakizuna nabarmendu ditu. Kanariarrek baloia dutenean Eibarren defentsa etengabe probatuko dutela uste du, eta partida erabaki dezaketen egoeretan eraginkorrak izatearen garrantzia azpimarratu du.
«Une batzuetan ekimena izango dugu, baina beste batzuetan baloia kenduko digute eta argi izan beharko dugu noiz egin aurrera presioa, noiz egon eta indartsu basculatu, eta noiz defendatu area», azaldu du. Baloia berreskuratzean, berriz, bertikaltasuna bilatu beharko dutela dio, aurkariari kalte egiteko.
Las Palmas hamargarren postuan iritsiko da Ipurura, hamar punturekin. Hiru garaipen, berdinketa bat eta bi porrot pilatu ditu orain arte, eta azken jardunaldian Burgosen aurka etxean galdu zuen, markagailuan aurretik egon arren. Gainera, Juanma Herzog ez da ariko Espainiako 21 urtez azpiko selekzioarekin konpromisoak dituelako.
Aurretik jartzea, baina ekimena galdu gabe
Eibarrek 18 aldiz jarraian hartu du aurrea partida batean eta garaipena lortu du. Aranbarrik aitortu du datu esanguratsua dela, baina ez du nahi taldeak markagailuaren arabera gehiegi atzera egitea. Granadaren aurka aurretik jarri zirenean taldeak pixka bat sufritu zuela gogoratu du.
«Ez dugu denbora gehiegi aurkariak egiten duenaren mende egon nahi. Horregatik, asmoa erasokorrak izatea eta aurkariaren bila joatea da», esan du. Emaitza edozein dela ere, Eibarren jarrerak ausarta izan behar duela defendatu du: «Badakigu une batzuetan atzerago egon beharko dugula, baina ideia erasokorrak eta ausartak izatea da».
Oraindik badago zer hobetu
Eibarrek bolada bikaina izan arren, entrenatzaileak ez du taldea amaitutzat jotzen. Eldan bloke baxuan denbora gehiegi eman zutela uste du, eta taldeak aurrerago egon eta erasokorrago jokatu nahiko luke.
«Egoerak daude hobetu behar ditugunak. Horri buruz hitz egiten dugunean, denok gauza berean sinesten dugula sentitzen dut», azaldu du. Aranbarrik taldearen barruan dagoen konfiantza ere nabarmendu du: «Taldea ikusten dudanean, denak norabide berean doazela eta konfiantza dutela ikusten dut». Horixe da, bere ustez, hurrengo urratsak emateko oinarria.
Horren barruan, bigarren lerroko jokalariek egiten duten ekarpena ere garrantzitsua dela azpimarratu du. Golak egiteko gaitasuna ez ezik, aurrelarien lan kolektiboa ere ezinbestekoa dela dio, bai baloiarekin bai baloirik gabe. Aurrelarien mugimenduek bigarren lerroko jokalarientzat espazioak sortzen dituztela eta presioan zein bloke baxuan taldeari trinkotasuna ematen diotela azaldu du.
Ipurua, berriro protagonista
Bosgarren garaipenaren ondoren seigarrena lortzeko aukerak arreta handia bereganatu badu ere, Aranbarrik ez du errekorretan pentsatu nahi. «Gauza politak dira bizitzeko, baina gu jokoan egin behar dugun horretan gaude zentratuta», adierazi du. Bere kezka nagusia asteburuan gertatu daitekeena aurreikustea, jokalariek beren zeregina argi izatea eta erabakiak ausardiaz hartzea da.
Eta gaur, gainera, Ipurua izango da agertokia. «Berezia da. Kanpoan gauzak ondo egin ditugu, baina Ipurua berezia da», esan du entrenatzaileak. Harmailatik jasotzen duten indarra eta energia eskertu ditu, taldeari gehiago ematera eta «mugara jokatzera» eramaten diolako.
Taldearen osasunari dagokionez, Eric Pérez prest dago eta aste osoa taldearekin entrenatu du. Lander Olaetxea ere taldearen dinamikan sartzen ari da, nahiz eta oraindik denbora behar duen taldearekin erabat kontaktuan egoteko. Aranbarrik, gainera, plantillaren zabaltasuna nabarmendu du, partida bakoitzaren planaren eta jokalari bakoitzaren unearen arabera aukera desberdinak izatea «pribilegioa» dela esanez.
Erdigunean ere aukera ugari ditu Eibarrek. Mada eta Aleix Garrido azken partidetan titular aritu badira ere, entrenatzaileak haien arteko harreman ona azpimarratu du. Biek erasotzeko zein defendatzeko gaitasuna dute, eta jokoaren arabera posizio baxuago edo aurreratuagoetan aritzeko aukera ematen diote taldeari.
Gaur, beraz, Eibarrek ez du soilik bere bolada luzatzeko aukera izango. Ipurua berriro beteko da, eta Aranbarrik argi utzi du zer nahi duen: «Gogoz gaude arratsalde hori elkarrekin bizitzeko, elkarrekin arratsalde polit bat bizi ahal izateko».
