Realak gaur Donostiako Anoeta estadioan egin du RS Enpresak klubak antolatutako Innovation Forum-aren lehen edizioa. Foro honetan, enpresa arloko ehun profesional baino gehiago bildu dira ideiak partekatzeko, joerak aztertzeko eta Gipuzkoako ekoizpen-sarearen, teknologiaren eta berrikuntzaren arteko lotura sendotzeko helburuarekin.
Adimen artifizialaren oinarriak
Ekitaldia 09:30ean hasi da networking gune batekin, parte-hartzaileek harremanak egiteko aukera izan dezaten hitzaldiei ekin aurretik. Lehen hitzaldia IE Teameko Maialen Cajaravillek eta Eider Amenabarrek eman dute, adimen artifizialari buruzkoa. Bertan, oinarrizko kontzeptuak argitu, ideia oker batzuk desmuntatu eta ekonomian, industrian eta zerbitzuetan dituen aplikazio ugariak nabarmendu dituzte.
Enpresen ikuspegia
Ondoren, HUPIko Irati Rodríguezek adimen artifizialak eskaintzen dituen aukerak aztertu ditu, baita enpresentzat haren adopzioan modu erabakigarri eta estrategikoan aurrera egiteak dakarren erronka ere.
Adimen artifiziala erakundeetan txertatzea
Bestalde, Siwebeko zuzendari nagusi Pablo Gonzálezek azaldu du nola txertatu adimen artifiziala erakundeetan. Bere ustez, garrantzitsua da ezarpena modu progresiboan egitea, prozesuak optimizatuz eta erabilera negozio-helburuekin lerrokatuz.
Realaren eta Multiverse Computingen lankidetza
Foroaren amaiera Realaren eta Multiverse Computingen parte-hartze bateratuarekin iritsi da. Bixen Calzónek, klubeko datu arduradunak, azaldu du nola kudeatzen eta ustiatzen duen Donostiako klubak informazioa, erabakiak hartzeko tresna giltzarri bihurtuz, bai kirol arloan bai maila instituzionalean. Ondoren, Multiverseko adimen artifizialeko soluzioen arkitektoa den Jon Leiñenak azaldu ditu arlo honetan klubarekin batera lantzen dituzten ereduak.
Topagune eta konpromiso estrategikoa
Ekitaldi honen bidez, Realak uste du Innovation Forum-a «enpresen, ezagutzaren eta teknologiaren arteko topagune» gisa finkatu dela, eta klubak kirol esparrutik harago doazen ekimenak sustatzeko duen apustua islatzen duela. Antolatzaileen hitzetan, «Realak, horrela, berrikuntzarekiko, bere ingurunearekiko lankidetzarekiko eta bere ekosisteman balioa sortzeko konpromisoa indartzen du».
