Debak kirola, natura eta ongizatea uztartuko ditu urriaren 24an, II. Basotik Txirrindulari Festaren harira. BSTK Basotik Fundazioak antolatutako ekimenak basoek gizartean eta ingurumenean duten balioa ezagutarazi eta haien zaintzaren inguruan herritarren parte-hartzea sustatu nahi du. Iazko lehen edizioaren harrera ona ikusita, helduentzako zikloturista martxaren plaza kopurua 350etik 450era igo da, eta antolatzaileek guztira 600 pertsona inguruko parte-hartzea espero dute.
89 kilometroko ibilbidea Debatik abiatuta
Jardunaldiaren ekitaldi nagusia II. Basotik Zikloturista Martxa izango da. 89 kilometroko ibilbide ez-lehiakorrak 09:00etan izango du irteera Debako Alamedatik, eta federatutako zein federatu gabeko txirrindulariek doan parte hartu ahal izango dute, aurretik izena emanda. Probaren amaieran, parte-hartzaileek opari-poltsa jasoko dute. Horrez gain, txirrindularitzaren inguruko hainbat erreferente ere izango dira Deban, tartean Laboral Kutxa-Euskadi Fundazioko Usoa Ostolaza, Ane Santesteban, Naia Amondarain, Idoia Eraso eta Eneritz Vadillo, eta Euskaltel-Euskadiko eta Euskadi Fundazioaren 23 urtez azpiko taldeko txirrindulariak.
Txirrindulari Txiki Festak familiak bilduko ditu
Festa, ordea, ez da helduen martxara mugatuko. Txirrindulari Txiki Festak familiak eta haurrak izango ditu protagonista, eta 11:30ean lau kilometroko bizikleta-ibilbide familiarra egingo da, ondoren gincana batekin osatuko dena. Parte hartzeko ez da aurretik izena eman beharko; nahikoa izango da 10:45etik aurrera Debako Alamedara gerturatzea. Jarduera horren bidez, Basotik Fundazioak txikitatik kirolarekiko eta naturarekiko harreman positiboa sustatu nahi du.
Kirola eta basoen zaintza, helburu beraren barruan
Ekimena Debako udalaren, Gipuzkoako Foru Aldundiaren eta kirolaren inguruko hainbat eragileren babesa ere izango du. Joseba Aramburu Gipuzkoako Foru Aldundiko Nekazaritza eta Lurralde Orekako zuzendariaren arabera, basoak gipuzkoarren eguneroko bizitzaren parte dira, eta haien kudeaketa eta zaintza herritarren inplikazioarekin lotuta daude. Aitor Galdós Laboral Kutxa-Euskadi Fundazioko manager nagusiak, berriz, kirolak gazteengana eta familietara iristeko duen gaitasuna nabarmendu du, eta kirola egiten den ingurunea zaintzearen garrantzia azpimarratu du.
Eguna giro onean amaituko da Alamedan, 13:00etatik aurrera egingo den herri-parrilladarekin, musikarekin eta Eusko Label eta Baserria KM0ko pintxoekin. Gainera, bi bizikleta zozkatuko dira: errepideko bizikleta bat helduen martxako parte-hartzaileen artean, eta mendiko bizikleta bat Txirrindulari Txiki Festan parte hartzen dutenen artean. Basotik Fundazioak herritar guztiak gonbidatu ditu urriaren 24an Debara gerturatzera, kirola, ongizatea eta naturarekiko konpromisoa egun berean partekatzeko.
