Sansek denboraldiko lehen garaipena eskuratu du Albaceten, 1-2ko emaitzarekin, lehen zatian erakutsitako nagusitasunari eta atsedenaldiaren ostean aurkariaren bultzadari eusteko izan duen gaitasunari esker. Mariezkurrenak eta Gorosabelek sartutako golek abantaila eman diote talde txuri-urdinari, eta Ansotegiren mutilek sendo eutsi diote markagailuari azken txistua jo arte. Hiru puntu baliotsu, eta bereziki hunkigarriak, azken egunetan bizitako galeragatik.
Hasiera ezin hobea
Sansek bost minutu besterik ez ditu behar izan markagailua estreinatzeko. Dani Díazen korner baten ondoren, Mariezkurrenak bakar-bakarrik errematatu du area barruan eta lehen aukera benetako gol bihurtu du. 0-1, partida hasi berritan.
Albacete baloiaz jabetzen eta ekimena hartzen saiatu da, baina talde donostiarrak oso ondo kontrolatu du norgehiagoka. Ansotegiren taldeak argi izan du zer egin behar zuen, sendo aritu da zelaian eta etxekoen jokoari erantzuteko gaitasuna erakutsi du.
Lehen zatia aurrera joan ahala, Sansek aukera gutxirekin arrisku handia sortzen jarraitu du. Ordu erdia igarota, Albaceteren atzeko irteeran egindako akats bat aprobetxatuta, Dani Díazen pase bikain batek Astiazaran bakarrik utzi du atezainaren aurrean. Aurrelariaren jaurtiketa, ordea, langa gainetik joan da.
Etxeko atezainak ere lan handia izan du. Atsedenaldia iritsi aurretik, Mariezkurrenaren bigarren gola eragotzi du esku-hartze bikain batekin. Baina ezin izan du ezer egin hurrengo jokaldian. Gorosabelek area kanpotik egindako jaurtiketa zehatza sareetara joan da, eta Sansek 0-2koa jarri du markagailuan 45+2. minutuan.
Albaceteren bultzadari eutsiz
Bigarren zatian partida erabat aldatu da. Albacete lerroak aurreratu eta intentsitate handiagoz atera da, eta berehala hasi da golaren bila. Fraga izan da Sanseko protagonista nagusietako bat. Lehen minutuetan San Bartoloméren jaurtiketa gelditu du, eta handik gutxira beste geldiketa bikain bat egin du Soberónen aurrean. Jarraipeneko jaurtiketa, gainera, zutoinera joan da.
Minutu zailak izan dira txuri-urdinentzat. Sansek atzean egin behar izan du lanaren zatirik handiena, eta erasoan gero eta zailtasun handiagoak izan ditu espazioak aurkitzeko. Hala ere, taldeak ordenari eutsi dio eta bi goleko errenta babesten jakin du.
Ansotegik berak nabarmendu du bigarren zatian taldeari falta izan zaiola lehen zatiko ausardia: «Atsedenaldian 0-2 joan eta bigarren zatian hasi orduko zalantzan jarri gara, ez gara presiora joan eta aurkariari espazioak utzi dizkiogu». Entrenatzailearen ustez, garaipena lortu arren, «horrelako gauzetatik ere ikasi behar dugu, hurrengoan aurretik gaudenean baloia izateko eta presioa egiteko orduan nortasun handiagoa izan dezagun».
Azken minutuetako sufrimendua
Albacetek ez dio etsi eta saria 80. minutuan iritsi zaio. Dani Bernabéuk ezkerrez egindako jaurtiketa zehatz batekin aldea murriztu du, eta azken hamar minutuak benetako sufrimendu bihurtu dira Sanserentzat. Etxekoek berdinketaren bila jo dute, baina talde donostiarrak sendo eutsi dio. Atzean konpaktutasuna mantendu eta arrisku handieneko jokaldiak urruntzea lortu du. Gainera, azken txistua baino lehen partida erabakita uzteko aukeraren bat ere izan du.
Azkenean, Sansek lortu du abantailari eustea eta hiru puntuak Albacetetik eramatea. «Etorri gara borrokatzera eta borrokatu egin gara», adierazi du Ansotegik, pozik taldeak egindako ahaleginarekin. Entrenatzaileak gogorarazi du, gainera, partida 30 gradutik gorako tenperaturarekin jokatu dela eta bi taldeek «fisikoki oso justu» amaitu dutela.
Garaipenaz harago
Hiru puntuek balio berezia dute Sanserentzat. Lehen garaipena da denboraldi honetan, eta Bigarren Mailako abenturaren hasieran konfiantza emango dion emaitza da. Ansotegik, ordea, argi utzi du garaipenak ez duela taldearen benetako helburua bistatik galtzen uzten. Sanseko jokalari gazteen garapena eta lehen taldera jauzia prestatzea dira proiektuaren ardatzak. «Klubak 18, 19 eta 20 urte dituzten mutil hauek edozein unetan jauzia emateko prest egotea eskatzen digu», azaldu du.
Ildo horretan, entrenatzaileak gogora ekarri du azken asteetan bost edo sei jokalari, eta batzuetan gehiago, lehen taldearekin aritu direla. «Bost, sei edo zazpi jokalari lehen taldearekin egotea albiste bikaina da klubarentzat eta baita Sanserentzat ere», esan du. Emaitzek garrantzia izan arren, etorkizunerako jokalariak prestatzea da taldearen zeregin nagusietako bat.
Eta hori guztia denboraldiaren lehen kapituluan. «Astez aste, partidaz partida joango gara», azaldu du Ansotegik. Oraingoz, lehen asteak irribarre batekin amaitu dira. Sansek lehen garaipena lortu du. Lehenengoa askoren artean izan dadila. Baina garaipen hau ez da beste edozein bezalakoa izan. Taldeak berak azaldu du partida amaitzean: hiru puntuak Ion Gómezi eskaini dizkiote. «Beti gogoan izango zaitugu, Ion».
