Bizikletaz Adinik Ez (BAE) elkarteak hamar urte daramatza adinekoei eta dibertsitate funtzionala duten pertsonei triziklo egokituetan paseatzeko aukera eskaintzen. Aire zabalean ibiltzeaz gain, beren herriekin eta komunitatearekin duten harremana indartzen dute horrela.
Gipuzkoako Foru Aldundiak BAEren hamarkada bateko lana aitortu du, gizarte inklusiboagoa eta irisgarriagoa eraikitzeko egindako ekarpenagatik. Eider Mendoza diputatu nagusiak nabarmendu du komunitatearen parte sentitzea eta haren babesa jasotzea garrantzitsua dela adinekoen ongizaterako. Boluntarioen lana ere eskertu du: haien laguntzari esker egiten dira irteerak.
Zazpi eskualdetara iritsitako ekimena
2023an, Foru Aldundiko Zainketa eta Gizarte Politiketako Departamentuak eta BAEk Bizi BAE proiektua jarri zuten abian, ekimena Gipuzkoako udalerri eta egoitza gehiagotara eramateko. Lehen urtean, 14 udalerritako 18 egoitzetara iritsi zen: 25 irteera egin ziren, eta 175 lagunek eta 87 boluntariok parte hartu zuten.
2024an, proiektuak jarraipena izan zuen zazpi eskualdeetan. Guztira, 14 udalerritako 19 egoitzatan egin ziren jarduerak; 130 egoiliar baino gehiagok hartu zuten parte, 60 boluntario baino gehiagoren laguntzarekin. Bi urteetako lankidetzaren balantzean, 305 egoiliar eta 147 boluntario izan dira ekimenaren parte.
Egoitzek oso balorazio ona egin zioten esperientziari: irteerek 9,89ko batez besteko nota lortu zuten, 10etik. Gainera, parte hartu zuten zentro guztiek jarduera errepikatzeko interesa azaldu zuten.
Laguntza, ekimena sendotzeko
Lankidetzaren bidez, BAEk bere baliabideak ere indartu ditu: triziklo berri bat eskuratu du, eta boluntarioentzako laguntza-materialak prestatu ditu. Horrek jarduera mantentzen eta pertsona eta udalerri gehiagotara zabaltzen lagundu du.
BAEren lana Gipuzkoako Foru Aldundiak sustatzen duen pertsonengan oinarritutako zaintza-ereduaren barruan kokatzen da. Eredu horrek autonomia eta komunitateko parte-hartzea bultzatzen ditu, erakundeen, hirugarren sektore sozialaren eta tokiko eragileen arteko elkarlana indartuz. Triziklo egokituen bidezko irteerek, gainera, egoitzetako bizilagunei beren ingurunearekin lotuta jarraitzeko eta udalerriko egunerokoan parte hartzeko aukera ematen diete.
