Erronka ez da nolanahikoa izango. CD Bidasoak 26/27 denboraldiko lehen norgehiagoka ofiziala jokatuko du ostiral honetan, eta aurrean Europako eskubaloiaren azken urteetako talde sendoenetako bat izango du: Sporting Clube de Portugal. Galiziako Vigo hiriko IFEVIn, 20:00etatik aurrera, irundarrek Superkopa Iberikoko finalerako txartela izango dute jokoan.
Bidasoarentzat sari berezia da lehiaketa. Aurreko denboraldian Kopan egindako ibilbide bikainak ekarri dio lehen aldiz Superkopa Iberikoan parte hartzeko aukera, eta Álex Mozasek argi du taldearentzat erronka handia dela. «Taldeko inork ez dugu inoiz Superkopa Iberiko bat jokatu, eta aurreko denboraldi onaren eta Kopan egin genuen lan handiaren saria ere bada», azaldu zuen entrenatzaileak aste honetako agerraldian.
Bidasoak prestaketa lanen azken azterketa izango du Vigo. Mozasek uste du taldeak pixkanaka gora egin duela udan, nahiz eta oraindik bere mailarik onenera iritsi ez. Aurreko denboraldiarekin alderatuta, gainera, prestaketa egiteko modua bestelakoa izan da, Europako aurretiko faseak markatutako presiorik gabe. Horri esker, «karga progresiboagoa» egin ahal izan dute, eta azken aurredenboraldiko partidetan taldearen bilakaera positiboa ikusi du entrenatzaileak.
Europako elitearen aurka
Sporting ez da, ordea, denboraldia abiatzeko edozein aurkari. Mozasek Europako «lau, bost edo sei talde onenen artean» kokatu zuen Portugalen talde berde-zuria, eta haren azken denboraldiak baieztatzen du maila hori.
25/26ko EHF Champions Leaguean final-laurdenetaraino iritsi zen Ricardo Costaren taldea. Aalborgekin berdindu zuen Lisboan lehen neurketan, 31-31, eta Danimarkan gol bakar batengatik geratu zen kanpoan, 37-36ko emaitzarekin. Aurretik, play-offetan Wisła Płock kanporatu zuen eta talde fasean Europako hainbat erraldoiri irabazteko gai izan zen, tartean Aalborg, Veszprém, Kielce, Dinamo București edo Kolstad.
«Azken bi urteetan gol batera edo bira egon dira Final Fourra jokatzetik, eta horrek dena esaten du», nabarmendu zuen Mozasek. Haren iritziz, Sportingek badu eliteko kalitatea, baina badago bereziki bidasotarrentzat erreferentzia izan behar duen beste ezaugarri bat: lehiatzeko modua. «Niretzat Europa osoko talderik intentsuena da. Ez bakarrik eskubaloiari dagokionez; nola ospatzen duten, nola dauden ekintza bakoitzean… Aurretik pasa ahal badizute, gainetik pasako zaizkizu. Partida nola doan berdin zaie, ekintza bakoitzera ehuneko berrehunera joaten direlako».
Garaipenaren inertziari eutsiz
Sporting denboraldi berrira irabazteko ohitura galdu gabe iritsi da. Joan den denboraldian Portugalgo eskubaloiaren nagusitasunari eutsi zion: Liga eta Portugalgo Kopa irabazi zituen, azken horretan Benfica luzapenean 41-39 menderatuta. Horrekin, hirugarren denboraldi jarraian hiru titulu nazional nagusiak eskuratu zituen.
Abuztuaren 23an, denboraldi honetako lehen titulu ofiziala ere poltsikoratu zuen. Benfica 31-24 gainditu zuen Portugalgo Superkoparen finalean, atsedenaldian jada 15-6 aurretik zegoela. Mohamed Ali atezain egiptoarra partida oneneko jokalari izendatu zuten, eta Sportingek bere historiako zazpigarren Superkopa eta jarraian lortutako laugarrena eskuratu zituen. Portugalgo eskubaloian aurrekaririk gabeko marka izan zen.
Hori guztia kontuan hartuta, Bidasoak badaki hasieratik adi egon beharko duela. Mozasek berak nabarmendu zuen Sportingek sarritan lehen minutuetan egiten duela alde handia: «Partida hasieretan apurtzen dituzte neurketa asko, eta sei edo zazpi goleko errenta hartzen dutenean oso eroso sentitzen dira». Horregatik, irundarren lehen helburua argia izango da: «Lehen hamabost minutuak hil ala biziko lehiarekin jokatzea, markagailuan hor egotea eta handik aurrera gure eskubaloia egitea».
Costa anaiez harago
Sportingek talentu gaztea eta esperientzia uztartzen ditu. Francisco eta Martim Costa anaiek taldearen proiektuaren ikur izaten jarraitzen dute, baina Mozasek ohartarazi zuen portugaldarrek ez dutela bi jokalari horien inguruan soilik eraikitako taldea.
«Costa anaiez beti hitz egiten da, baina Salvador Salvador, Natán Suárez, Jan Gurri edo Mohamed Ali ere hor daude», gogorarazi zuen Bidasoako entrenatzaileak. «Talde oso-osatua dute, eta horrelako emaitzak lortzeko beharrezkoa da».
Azken Superkopako finalean ere argi geratu zen Sportingek baliabide ugari dituela. Francisco Costak zortzi gol sartu zituen, baina Salvador Salvador, Natán Suárez, Emil Berlin, Orri Þorkelsson eta beste hainbat jokalarik ere ekarpen handia egin zuten 31-24ko garaipenean.
Mindegia: «Hasieratik aurpegi lehiakorra eman behar dugu»
Niko Mindegia ere bat dator aurkariak ezarriko duen erritmoari aurre egiteko gakoarekin. Bidasoako erdikoak badaki Sportingek exijentzia fisiko eta mental handia eskatuko duela. «Talde gaztea da, asko korrika egiten du eta oso fisikoa da. Aurredenboraldia izan, Superkopa izan, Liga izan edo Champions izan, beti berdin jokatzen dute», adierazi zuen.
Mindegiaren ustez, irundarrek ezin izango dute partidara pixkanaka sartu. «Hasieratik oso intentsu eta kontzentratuta atera behar dugu, ekintza bakoitzean dena emanez. Akatsak egongo dira, denboraldiaren hasieran gaudelako, baina niretzat garrantzitsuena hasieratik aurpegi lehiakorra erakustea da».
Doneztebarrak, gainera, baikor hitz egin zuen Bidasoan izan dituen lehen asteez. Taldean ondo integratu dela eta fisikoki egoera onean dagoela azaldu zuen, eta bere esperientzia eta taldeari egin diezaiokeen ekarpena argi dituela nabarmendu zuen.
Beldurrik gabe, baina errealismoarekin
Bidasoak badaki paperean Sporting dela faboritoa, baina Mozasek ez du talde irundarra Vigora joango den ikusle huts baten moduan ikusten. «Ez gara hara joango denbora pasatzera edo haiek nola jokatzen duten ikustera. Ahalik eta zailtasun gehien jarri nahi dizkiegu».
Helburua, beraz, ez da soilik aurkariaren indarra jasatea. Bidasoak bere nortasuna erakutsi nahi du, aurredenboraldian hilabete eta erdian landutakoa kantxara eraman eta lehiaketaren presiorik handienaren aurrean zer egiteko gai den ikusteko. «Gure eskubaloia ere eskaini behar dugu, beldurrik gabe, baina aurrean Europako talde onenetako bat dugula jakinda», azaldu zuen Mozasek.
Ostiraleko finalerdia denboraldiaren hasiera baino askoz gehiago izango da. Bidasoarentzat prestaketa amaitzeko proba zorrotza da, baina baita taldearen hazkundea neurtzeko aukera ere. Eta finalerdia gaindituz gero, larunbatean Barça edo FC Porto izango luke aurrean.
Vigoko IFEVIk, beraz, eskubaloiaren lehen mailako erronka hartuko du. Bidasoak ilusioa eta lehiatzeko gogoa eramango ditu bertara. Aurrean, ordea, gosea, intentsitatea eta garaipenaren ohitura bere nortasun bihurtu dituen Sporting bat izango du.
